《事情是這樣的......》

我同親愛的K小姐去韓國旅行,回程的時候(9/6),飛機坐我隔離(左面)的女人是係美國回來的。後來(今日)衛生署的人中午12點打黎同我講個女人證實左有H1N1,問我有冇發燒咳嗽肚瀉等病症,我話冇,但我需要去鯉魚門渡假村做個簡單的檢查。衛生署會派人黎接我同送我回家。


說是檢查,其實是量體溫睇我有冇發燒,然後問診同係醫生面前食左粒特敏福。如果沒有病症出現就可以回家,自我隔離6-7日(計法是同病者接觸後的7日內),如果不幸出現病症,就需要被強制隔離直到檢驗到是不是帶有病毒(也是7日內)。因為病毒一旦感染潛伏期是7日,7日內不病發就沒有被感染或是病菌已被殺死。


傳播病毒的途徑是經飛沬,主要經咳嗽或者打噴嚏。也有可能是接觸帶有病毒的物件後,再觸摸口鼻而受感染。一般室外的空間,特別是有陽光,病毒幾分鐘之內就會消滅,室內的話最長則是30分鐘咁上下,主要是空氣不流通溫暖潮濕的地方。醫生話,病人出現病症之後8-10個鐘後先有傳播病毒的能力。所以接觸過我的人不用擔心,我到目前沒有出現過病症。


此外,一般人感染這個病毒,發病後治療2-3日就可以完全痊癒。所謂的高危人士是指那些長期病患者/受了傷的人/孕婦/幼兒,因為他們的身體抵抗力弱,由其係長期病患者(例如哮喘病同糖尿病人),容易出現拼發症,嚴重者就會危及生命啦!所以有可能感染病毒就要帶口罩!!洗手!同減少去人多既地方!因為一旦爆發社會感染,那些高危人士就會好危險!!!幸好,醫生說目前香港所感染的病者病毒都算輕微,只要及早發現同治療就問題不大。


懷疑感染的人(例如我),由於沒有出現病症,所以由而家開始的4日內我每日要自行去指定的診所問診量體溫同係醫生面前食左粒藥。4日內如果沒有病發(前後加起來是7日嘛),醫生就會俾另外個5日既特敏福我,我就不用再去診所(也可以出境)。為什麼是10日的藥呢?因為成個療程是10日啦。


好了,解釋大概係咁上下。


今日車我去鯉魚門的司機很好禮貌(雖然他沒有戴口罩令我覺得佢實在神勇,不過我相信佢係黎唔切戴就要走去車D人姐,因為佢一到步就問D人借口罩。)我是第一個人上車,佢同我講:唔好意思我要去再車多兩個人就可以去鯉魚門了!然後唔該前唔該後的。


我明白,我們經歷過SARS, 大家在這個骨節眼敏感些是正常的。其實遇到這件事真的是不幸啊!有些負面情緒出現其實是可以理解的。但是這不是必然的。同車有人投訴架車太冷,(由於車是沒有窗的,所以溫度必須維持21度以下,怕冷的人如不幸要坐車請帶多件褸。)有個女人在檢查的大堂大吵大鬧說俾蚊針D醫護人員竟然唔俾蚊怕水佢: 我係到成日啦!!都未有車黎車我去默李浩,8個鐘,深圳來回都得啦!!我被蚊針左5粒啦!我話肚餓你地D人竟然拿杯麵俾我食飯盒都冇個!balabala......


啊小姐,妳冇錯係慘,不過個到既醫護人員同救傷隊既人一日到黑都要係個到工作呀!而且分分鐘係廿四小時咁對住D疑似病人!你俾蚊針左幾下姐!如果咁都傳染到就唔會係個到設站啦!而且分分鐘係你有病傳俾人地架好唔好!而且你餓一日唔食野都唔會死的,當減肥啦!


醫生問完我診既時候,佢問我食左野未,我話未,然後佢俾左D餅乾我,還幫我倒了杯水,我跟他道謝,佢話: 唔使多謝,你地都係受害者姐! 那十幾分鐘的問診裡,佢不厭其煩咁詳細答我既問題,那陣都晚上十點幾了,可知道一日可能有過百個人咁問佢呢!


然後他的老闆經過,問佢使唔使休息下,佢話:唔使啦!我地而家個個都鬥志激昂!


感動啊!


我覺得政府這次真的做得算不錯了。醫生說呢個星期新增左好多疑似病人同病人,大家要小心身體,做好清潔的動作同有唔舒服就戴定口罩啦!避免去D人多既地方!如果你係屬於高危人士,最好還是戴個口罩保護自己!


在此,真的很感謝支持我的親愛的朋友。祝福我吧!




P.S.
今日衛生署D人打黎的時候,我正在睡夢中。講完電話,轉個身就發現一張由E先生係西安旅行寄過來的POSTCARD,只有三句野,最尾一句咁寫:「希望你不要被隔離!」


他媽的烏鴉口!!我前世同你有仇嗎!!!正常人會咁寫架咩!!!